Protesta ne KPTHN, rrogat ose vijojme protesten.

Naftëtarët e Ballshit kanë vijuar edhe sot protestat e tyre. Qindra punonjës të Kombinatit të Përpunimit të Thellë të Naftës në Ballsh, kërkojnë pagesat e prapambetura prej administratorëve të ARMO-s. Punonjësit e naftës bojkotuan punën dhe protestuan për plotësimin e kërkesave të tyre.
Ndonëse në ditën e katërt të protestës së tyre, punonjësit thonë se nuk kanë marrë asnjë sinjal pozitiv nga drejtuesit e ARMO-s për zgjidhjen e situtatës.
Protestuesit theksojnë se janë të vendosur të vijojnë protestën derisa kërkesat e tyre të merren në konsideratë. Shumë prej tyre theksuan se paga e kësaj pune ishte e vetmja e ardhur për familjen. Për këtë shkak, ata kërkojnë me ngulm që të paguhen për punën e kryer, pasi nuk kanë asnjë mundësi tjetër për të mbajtur fëmijët e tyre.
Kjo nuk është hera e parë që punonjësit e KPTHN-së në Ballsh protestojnë. Gjatë muajve të fundit, ata kërkuan disa herë të plotësohej kjo kërkesë, pra të merrnin pagesën e rrogave të prapambetura, por më pas u detyruan të vijonin sërish punën.

Punonjësit thonë se administratorët e rinj u patën premtuar dhënien e parave, si dhe rikthimin e të hequrve nga puna. Të njëjtin premtim kanë bërë pronarët azerë para qeverisë së mëparshme edhe verën e kaluar, kur morën në dorë pronësinë mbi ARMO-n. E megjithatë, punëtorët e naftës pohojnë se asnjë nga këto premtime nuk është mbajtur dhe kjo ka rënë në kurriz të tyre dhe familjarëve.
fieri.com

Comments